A casa forti hè fatta da risista à l’abbotti. I muri sò spessi è u contrafforti ancu di più. L’inchjavitatura d’angulu hè bedda rigulari è soda, fatta à quatri. A carciara era a parti debula di a casa. Da impidiscia a ghjenti d’entra ci sciappendu a porta po di piccià focu à l’internu, un piumbatoghju hè fattu à l’appiombu da lampà petri nant’à l’assaltadori, è ch’eddi ùn stessini accantu à a porta.

L’intrata principali, a porta maestra, hè à u prima o à u sicondu pianu è ci si cuddava cù una scala di legnu chì si pudia caccià in tempu piriculosu. A petra tistimonia priveni chì u tarrenu da sottu apparteni à a casa po parmetti d’appiccià una casa altra à a casa forti. L’archera parmetti di guardanià è di tirà nant’à i nimichi chì cercani d’entra o chì passani troppu vicinu.

Mancu un annu dopu à a vittoria di Ponte Novu, Regnu di Francia voli un invintariu cumplettu di l’isula. In più di a vuluntà dui cunnoscia i lochi (a tupunimia hè impurtantissima pà i militari), ci hè quidda di a rintabilizazioni è dunqua di ditarminà u fundariu è di fà ni un righjistru di censu da metta in baddu una fiscalità.

A discrizzioni pricisa di l’isula devi dinò essa u fundamentu di un pianu di missa in valori, di « righjinirazioni », cosa à a moda di l’epica di l’illuministi.

Hè cusì ch’eddi sbarcani in Bastia, u 30 d’aprili di u 1770, vint’ottu impiigati (giu;graffi, misuradori, scrivani, disignadori, giu;metri…) in carica di l’ilaburazioni di u « plan terrier ». L’opara hè di 25 anni !

L’inchiesta hè un studiu cumpiitu : Sò riparturiati 47 fiumi, 1 100 fiumiceddi, 4 571 funtani… tuttu ci hè, da u locu d’una surghjenti à a ripartizioni di i prupiità trà particulari, da u numaru di mulini è fragni in ogni paesi à a qualità di i tarri, a natura di i piantazioni (vigni, aliveti, castagneti, furesti, machja, pascili…) o a discrizzioni di i bandi picurini o capruni ! U risultatu hè, ind’u 1795, a rializazioni di 39 scartucci (rottuli di carta) chì, missi insemi, facini a carta di a Corsica misurata cù a tecnica di a triangulazioni. 17 righjistri venini da cumplittà sta cartugraffia, discrivendu distritti, pruvinci è cumunità di l’isula.

Dui seculi dopu, l’opara tamanta di l’ingineri Testevuide è Begidis ci faci veda un’imaghjina di i più veri di u nostru tarritoriu (a tupunimia ferma a più pricisa chi fù trascritta sin’ad avà) è stu « Plan terrier » pò essa cunsidaratu com’è un’opara d’arti.

Hè più cà sicura oghji chì a testa mora di a bandera Corsa veni da l’Aragona. Stu Regnu currispundia à l’epica midivali à un tarritoriu cù a Catalogna com’è centru. Di a so adunita cù u Regnu di Castiglia nasciarà dopu a Spagna. A testa mora, a truvemi dighjà nant’à u sughjeddi aragunesi ind’u 1281 !

Fattu hè chì u papa Bunifaziu VIII dà a Corsica è ancu a Sardegna à u Rè d’Aragona ind’u 1297. Truvemi nant’à l’isula dipoi sta data signori à favori di l’Aragona è contru à Ghjenuva. Forsi t’aviani sti signori adupratu a testa mora com’è segnu. Veni da appughjà stu dettu a scuparta fatta sott’à u casteddu di A Rocca di Vaddi (Ulmetu, casteddu di i Da La Rocca), d’un aneddu sughjeddu cù una testa mora sola. U rè d’Aragona n’aduprava quattru è si pudaria veda quì una certa sfarinziazioni di i signori Cinarchesi chì ricunnisciani l’Aragona, com’è certi Da la Rocca o d’Istria. Vincinteddu d’Istria fù vici Rè di Corsica, numinatu da u Rè d’Aragona.

Ind’u 1573, u scrittu di u ricensu di i pussissioni di u Rè di Spagna figura a Corsica cù una testa mora è a Sardegna cun quattru. Sbarcatu ind’è noi ind’u 1735, u baronu di Neuhoff diventa Rè di Corsica è adopra a testa mora nant’à a so armuratura. Gaffori è Paoli adoprani sta bandera, cunfirmata da a Cunsulta di Corti ind’u 1762. A testa mora hè stampata nant’à u biancu, simbolu di a Verghjini. Firmarà nant’à i muneti, l’atti amministrativi, a bandera… U regnu anglucorsu (Février1794- Octobre 1796) ripigliarà stu simbulu. Sta bandera cù a testa mora, uffizializata à u XVIII^mu, ferma una di i più anziani d’Auropa !

L'armuratura di a Corsica :
una lettara di Pasquale Paoli à Rivarola (amicu soiu è omu di fiducia), u 23 di ghjugnu di u 1760.

« L’arma dunque del regno deve esser coperto sotto un padiglione¹ come stanno le armi de’ sovrani nei loro editti. Quella che si pone alle carte geografiche di Corsica, è meglio, levata però la catena di Teodoro². Quando non ci voleste far mettere li due giganti marini, poteve farvi mettere per sostegni li trofei militari, e guarnirli colli fasci che sono il simbolo della libertà ; e così sarebbe meglio. Dovrebbe, per servire a noi, esser scolpita come l’acchiusa di Francia³, che credo sarà di minor spesa, e di più facile uso allo nostro stampatore. La corona, la testa, ed un grazioso intreccio di fascetti di vincola⁴, che sono il simbolo della libertà e della forza de’ stati liberi ; niente altro ci deve essere. »

1. Baldacchinu. 2. U rè di Corsica. 3. Com’è à nantu à u ducumentu francesi aghjuntu (l’acchiusa) à a lettara 4. Vette di salice

Ogni volta chì i rivolti diventani impurtenti, Ghjenuva chjama à l’aiutu un’armata straniera putenta par dumà i rivultati.

In u Maritarraniu, a situazioni hè sputica : ogni putenza t’hà intaressu chì l’altra ùn tinissi a suvranità nant’à a Corsica è, dunqua, chì i Ghjinuvesi a cunsirvissini.

Quandu una putenza si ni và da a Corsica, cacciata da un’antra, i Corsi chì a sustiniani (pinsendu d’avè trovu una manera di spiccà si da Ghjenuva) sò maltrattati è cumencia un epica di riprissioni.

Di sta riprissioni nasciarani altri inghjustizia è altri rivolti… u ciculu ùn finisci mai.