Senza ducumenti scritti, à l'archiolughi li tocca di scavà da ritruvà i vistichi di a prisenza di l'omi priistorichi : arnesi di petra o ossi (quiddi fatti di legnu ùn ani risistuti à u tempu), carboni di legnu isciuti da i fuconi…

U scavu di l'abitati priistorichi hè minuziosu assai : ogni ughjettu và misuratu è paragunatu cù l'altri da ritruvà i modi di vita di i priistorichi, ditarminendu i lochi duv'eddi faciani u focu, duv'eddi travagliavani a petra o ancu i so lochi di riposu.

Hè ben capita chì più sò prufondi i strati archiolughi, più sò vechji i vistighi. Pà una datazioni pricisa, i laburatorii facini l'analisi di u C¹⁴ cuntinutu ind'i carboni di fuconi (sminuisci di 50% a radiuattività di u carboniu 14 ogni 5730 anni). A l'ani ancu fatta à l'urighjini di l'ussidiana trova in Corsica cù l'analisi pà attivazioni niutronica : sti petri venini guasgi tutti da u situ sardu di Monti Arci, ed uni pochi da l'isuli Lipari, sopra à a Cicilia. Hè cusì data a prova d'un scambiu maritarraniu più di 5000 anni nanzu à Cristu !

Civilizazioni niulitica di u maritarraniu, hè carattirizatu u Cardiali da u dicoru di i so tarragli, fatta cù un cunchigliu : u cardiu. A pudariami qualificà dinò di marittima postu chì tutti i siti scuparti ind’u Maritarraniu sò situati à menu di centu chilometri da u mari. Parechji lochi sò stati trovi in Corsica : da u mari (A Petra à Lisula) à a muntagna (Aggrottu Albertini in Niolu), da u Nordu (Strette vicinu à san Fiurenzu) à u Meziornu (Araguina in Bunifaziu)..

A navigazioni dighjà attistata cù l’apparizioni nant’à l’isula di petri stranieri, hè cunfirmata cù l’apparizioni di ciramichi diversi : coppi, cuppetti, pignati è urnatu di cardiu. Di st’epica datani i punti di freccia è rughji in petra battifocu o ussidiana, dui petri ch’ùn sò di u lucali. I gruppi umani sò tandu pochi, furmati da stirpugli d’una vintina d’individui sempri à tramutà si, campendu sottu à tendi o in spilonchi.

Pesca è caccia sò impurtenti com’eddu a ci insegna l’aggrottu d’Araguina in Bunifaziu : ci ani trovu avanzi di trigli, ostrii è durati è, soprattuttu, più di 24000 ossi di prolagu, st’animali chì assumigliava u topu è u cunigliu, stirpatu in Corsica da a caccia arrabbiata chì li era fatta.

S’edda pari di menu impurtenza l’agricultura, l’addevu hè beddu prisentu cù resti di pecuri è di capri, animali urighjinarii d’Asia cintrali (Armenia, Azerbaidjan) è dunqua purtati ind’è noi da l’omi. A pecura ammansata avaria datu, dopu turrata à a vita salvatica, a nostra mufra  (hè l’ipotesi di l’ insalvatichera).

Dipoi u Niuliticu, l’Omu hà arrizzatu petri chì no chjamemi « stantari ». Stu fattu hè cumunu à tutti i lochi di u mondu, da l’India à a Curea, da a Scandinavia à a penisula Iberica. In Francia, sò assai numarosi ind’i rughjoni di Brittania è di Corsica. Stu fattu migaliticu hè difficiuli à studià chì ùn si tratta quì d’una civilizazioni. Di più, a so datazioni hè cumplicata da u fattu ch’ùn si trova guasgi mai nudda à u pedi di sti petri stantarati. Difatti, parti è più di sti munimenti sò stati spiazzati è ùn sò più à u locu induva erani stati ficcati à principiu. Si pò quantunqua rimarcà chì in Corsica, i stantari in piazza sò arrizzati parechji volti nant’à passaghji assignalati : bocchi, crucivii, vargaghji, surghjenti…

A Corsica pussedi guasgi 1000 stantari cunnisciuti è trà quisti, più di centu sò statuli armati. Ciò ch’eddi significheghjani sti stantari ferma pà u mumentu un misteru, ma si rimarcarà chì più d’una volta, sò assuciati à sipulturi (pancali o tola). Calchivvolta, i stantari sò in filarati. In Paddaghju, accantu à Sartè, 258 stantari sò cumspartuti in 7 fili. In certi lochi com’è in Stonehenge in Inglitarra, formani un chjerchju in rilazioni cù un cultu sulariu.

Ùn si pò veda una crunulugia dipoi i petri drizzati com’eddi erani sin’à quiddi armati, passendu par quiddi cù lati rigularizati o allisciati è quiddi fendu veda spaddi è capu missu in rilevu. Certi zuccavani i stantari quandu l’altri pisavani monti com’eddi erani. Si pò quantunqua parlà di famigli sfarenti : par indettu, i stantari antrupumorfichi di u Nordu è di u centru di l’isula sò più fini, cù un capu beddu zuccatu è arichjoni. Di certi altri, si vedi una bocca aparta (com’è quiddu di Tavera quì accantu) o s’hè trovu annantu tracci di tinta rossa… quisti erani dunqua beddi culuriti è si vidiani da luntanu! Pricisemi chì di sta tinta rossa minirali si ni truvava dinò nant’à i corpi sipolti.

A funzioni di i toli pari cunnisciuta. Si tratta  parechji volti di tombi cullittivi. Par disgrazia, i corpi è l’ufferti sò spessu spariti, causa à a qualità di a tarra è i circadori di tisori. Ind’è noi, a ghjenti pinsava chì sott’à i toli, ci era oru !

Sti tamanti « sipulturi » sò tistimonii d’un travaglioni cullittivu cù una manudopara numarosa ed urganizata. Sò chjamati « tola » o « stazzona » è a so apartura si faci d’un cantu solu, versu u punenti pà u più.

Altri sipulturi asistini sopra tuttu in Corsica : i pancali. A so apartura si faci pà u sopra. Certi di sti tombi erani cuparti à petri è tarra. Una todda cusì fatta hè chjamata tumulu. Hè dunqua sempri nicissariu di scavà i lochi à l’intornu da ritruvà i petri chì mancani oghji, quiddi di u tumulu è quiddi chì furmavani a basa di u pughjolu.

U nomi chì l’hè statu datu da i paisani hè spessu liatu à u mali : a stazzona di u diavuli, a tola di i turmenti… sò assai prisenti ind’i foli corsi chì si cuntavani à veghja.

Dopu a custruzzioni di munimenti chjamati « torri », à u principiu di l’Ità di u bronzu, i siti sò furtificati toccu a fini di st’epica. In certi lochi, i petri cascati da a torra ghjovani da fà i muraglioni di prutizzioni (Cucuruzzu accantu à Livia). Chjamati tandu casteddi, sti lochi ani a particularità di a larghezza di i so muri, a strittezza di i so curridori è a prisenza di lochi è purteddi di guaietu.

Supranendu i pianeddi cultivati, i casteddi pudiani ghjuvà da lochi di rifughju è di magazenu, ancu d’atelli d’artighjani. I muragli à l’intornu ani pussutu ghjuvà da basi à custruzzioni di legnu, com’edda si farà ancu più tardi à u principiu di u Midievu.

S’eddi sò anzi tuttu in a Corsica suttana sti casteddi, si ni trova in altri lochi. A sardegna conta assai assai nuraghi ma hè vera ch’eddu ùn si vedi cà una sissantina di munimenti cusì in Corsica.

U mitaddu ghjova soprattuttu à l’arnesi, ch’eddi fussini agriculi o guirrieri. Pugnali è spadi ritrovi sò i listessi cà quiddi zuccati nant’à i statuli armati di a listessa epica.