Piccula capitali di Pruvincia, rifatta in 81 nanzu à C., t’hà tutti i spicificità di a cità rumana : foru, termi, tempii, basilica, tiatru, arena… cù una struttura fatta intornu à u cardu è u dicumanu, Oghji, ùn ni ferma cà u pianu chì tutti i munimenti sò stati sdrutti da i Vandali versu 420 po i petri sò stati pigliati da fà altri custruzzioni à u Medievu. U foru accupa una parti maiò di u locu : hè limitatu à Nordu è Meziornu da culunnati induv’eddi erani i buteghi.

• À Liventi, u situ hè sarratu da u Tempiu cunsacratu à Roma ed à Augustu, vali à dì à u cultu impiriali.
• À punenti, u Capitoli in forma di trapeziu (70m x 35 m), didicatu à Ghjovi, Minerva è Ghjunoni, faci parti di u Pritoriu (risidenza di u Pritori amministrendu a Pruvincia).
• Dui termi à u Nordu di u pritoriu è in Santa Laurina (portu di cummerciu da sottu à u pianu) tenini una cunfigurazioni classica : i caldarii (bagni caldi), i tipidarii (bagni tepidi) po i frighjidarii (bagni freti). L’aria calda viaghja da sottu à u sulaghju di i dui primi sali. L’arena elittica longa 29 metri pudia accoglia 2800 parsoni nant’à i so scalini di legnu.

U scopu di i Rumani tinendu à Aleria pari d’essa statu u cummerciu di u vinu cù a Gallica.

Versu l’annu 100 nanzu à Cristu, Marius faci una culunia accantu à a foci di u fiumi Golu. U tarrenu hè cadastratu è i tarzeddi di listessa stesa sò dati à l’anziani di i lighjoni rumani o anziani marinari. Mariana (veni da u so fundatori u nomi) piglia a so impurtenza chì Aleria hè ind’i difficultà : a rena invadisci a foci di u fiumi è i Vandali ani struttu a Cità.

Cusì piglia Mariana a suprana è diventa u portu principali pà l’importu di a marcanzia vinuta da l’Italia. L’amministrazioni impiriali rumana sparisci à pocu à pocu cù l’invasi barbari è a Ghjesgia piglia u seguitu. Trè centri pulitichi, acunomichi è suciali s’imponini : a Pievi di Sagona, quidda di Aleria è quidda di Mariana. Custruzzioni si sviloppani à l’intornu di i palazzi apiscopali è i basilichi.

Ben chì cunnisciuti dipoi u III^u seculu, i cumunità cristiani diventani diòcesi solu versu u V^u seculu, cù u slanciu di Veschi vinuti d’Africa di u Nordu isiliati in Corsica da i Vandali. U situ paliucristianu di Mariana era fattu d’una basilica, d’un battisteru è d’un viscuvatu.

A basilica, longa 39 metri è larga di 17,90 t’hà un pianu in 3 navati spiccati da 3 filarati di 8 culonni di granitu. Ci si trova musaichi pulicromi cun dicori d’animali, fiori o formi giumetrichi. Hè oghji sparita sott’à a catidrali di u XII^u seculu. U battisteru hè fattu d’una piscina cruciforma cù un baldachinu uttugunali sustinutu da culonni di granitu è marmaru pà u pedi.

À u I^ma seculu, villi è pricoghji sò fatti à u locu dettu oghji San Ghjuvanni. Sti stabbilimenti sò in leia stretta cù a cala di I Canni, duv'eddu ci hè avali u portu Charles Ornano. Asistini tandu rilazioni cummirciali cù tuttu u Maritarraniu è soprattuttu cù l'Africa di u Nordu.

• À tempu, una nicropuli si sviloppa trà a zona di u portu è quidda di l'abitazioni. Un studiu di i sipulturi trovi insegna chì, ancu s'edda ùn hè sparita a cultura di a crimazioni, a sippiddera hè ghjiniralizata. I salmi sò posti in cavi o sottu à tombi in tettu, fattu à teculi è coppi. Certi altri sò missi in l'anfuri. In certi casi beddi scarsi, u corpu hè postu ind'un sarcufaghju zuccatu è dicuratu, com'è quiddu dettu di u « bon pasteur » chì si pò veda à a Prifittura d'Aiacciu.
• À u VI^tu seculu, Aiacium diventa a sedia apiscupali è un vescu ci si stabbilisci. Una catidrali cù u so battisteru sò fatti à mezu camminu trà l'abitazioni è u campusantu. À l'intornu, si sviloppani l'attività artighjanali com'è u travagliu di u mitaddu, di a lana, o di a fattura di teguli è copi.
• À principiu, a vasca battisimali era cruciforma cù una prufundezza di 1 metru 24.
• Mentri u prima Medievu, forsi u VII^mu seculu, u battisteru hè mudificatu. L’anziana vasca hè meza strutta è a nova hè tonda. Pari ch’eddu cambii u ritu di u battesimu, passendu da l’imirsioni à a spirghjinata

A catidrali d’Aiacium starà u centru rilighjosu di u tarritoriu seculi è seculi ma ùn pigliarà u nomi d’Aiacciu cà toccu u XII^mu seculu. U situ sendu di più à in più malsanu, causa à l’acqui impuzzati, una cità nova hè fatta accantu ind’u 1492 è a sedia apiscupali hè tramutata.