Sta torra, chjamata ancu « ridotta di a Pasciola », hè stata alzata da i Francesi ind’u 1771 da cuntrullà i cumunicazioni interni. Posta nant’à a cumuna di Vivariu, u munimentu fù classatu munimentu storicu u 25 di marzu di u 1977.

Sottu à Napulioni u 1^ma, u ghjinirali Morand, in carica di l’amministrazioni di l’isula, ni feci una prighjoni à posta pà i « ribeddi à l’auturità impiriali », vali à dì i paulisti è tutti quiddi scuntenti di i leghji novi.

Funi numarosi i prighjuneri ad essa turturati è tombi in stu locu. U paesi di Vivariu t’hà sempri in menti i stridi di dulori di quiddi tintareddi.

Hè cusì chì  a Pasciola inghjinò una sprissioni sputica. Par dì « Chì tù vachi in infernu », si senti par sti lochi « Chì tù sia di a Pasciola ! ». Si capisci tandu u simbulu ch’edda hè divintata a torra ind’a mimoria paisana.

A Corsica conta sei citadeddi : Bastia, Calvi, Aghjacciu, San Fiurenza, Corti è Bunifaziu. Alzati da i Ghjinuvesi, sò furtezzi chì ghjovani da pruteghja l’abitenti di i cità ch’eddi cumandani. Parechji volti, un quartieru si trova à l’internu di i furtificazioni.

A citadedda di Corti fù custrutta in dui tempi :

• 1^ma : À u Medievu, ind’u 1419, u nobili Cinarchesu Vincinteddu d’Istria, numinatu vicirè di l’isula da u rè d’Aragona, feci alzà un casteddu nant’à u poghju.
• 2^du : À l’epica muderna, i truppi francesi di u Conti di Vaux, dopu à a vittoria di Ponte Novu, cumincioni toccu u 1769 a custruzzioni di a citadedda com’edda si vedi oghji è chì circundava u quartieru di E Castellacce.

T’avia dui funzioni a citadedda :

• Fà di Corti l’ultima difesa di a Corsica in casu d’abbottu. Hè cusì ch’eddi funi custrutti i putenti furtificazioni « à a Vauban » cun bastioni pienii di tarra da impidiscia i disguasti di i paddoni.
• Fà di a cità una piazza forti chì pudia accoglia una guarnighjoni capaci di risista à una rivolta. Cusì sò fatti dui bastimenti : una caserna chì pò allughjà 600 suldati è un spidali militari oghji mutatu Museu di a Corsica (à u locu di l’anzianu quartieru di E castellacce spiantatu).

I prugressi di l’artigliaria (obusi capaci di strughja tutti i furtificazioni) vensini à cuntrarià u prima scopu è Corti firmò solu una cità di guarnighjoni.