Hè un situ assignalatu par ciò chì tocca à l’aspettu marittimu (calanca fonda ghjuvendu d’aggrottu), militari (penisula accinta à zenni calcarii) è strateghjicu (cumanda u passaghju trà Corsica è Sardegna). A cità hè custrutta ind’u 1195. Ghjenuva ni faci un prisidiu da tena i vii marittimi è sviluppà a so attività cummirciali. Ci sò stabbiliti famigli liguri, paisani, pastori, marcanti è suldati. L’amministrazioni hè cunfidata à un pudistatu numinatu da Ghjenuva ogni 13 mesi. Hè aiutatu ind’a so carica da un Cunsigliu cumpostu di i famigli di i marcanti ricchi. Hè fatta sta cità à a sumiglia di Ghjenuva, cù casi alti longu à stritteddi scuri. Casi è muraglioni supraneghjani u portu duv’eddi navigani i batteddi di cummerciu po quiddi di corsi, pronti à attaccà ogni batteddu stranieru chì batti ind’u Maritarraniu.

Ind’u 1270, hè alzata da i Timplari sott’à l’impulsu di u vescu Nicolao Fortiguerra a ghjesgia San Duminicu

Hè di primura pà a cità di fà cummerciu è dunqua ch’eddi ghjugnini sin’à edda i pruduzzioni di a parti suttana di l’isula è di u nordu di a Sardegna, pruduzzioni chì sarani mandati in Ghjenuva. Da Ghjenuva, faci ghjugna marcanzii di lussu : spezii, vini, tissuti, ughjetti isciuti da a mitaddurgia è ciramichi

U so beddu tarritoriu pianu porta à un cunflittu cù i cumunità di a Rocca vicina è i so signori chì u rivindicheghjani. A cità pruspareghja prestu, ni tistimuneghjani l’ingrandimentu o a custruzzioni di i ghjesgi (Santa Maria, San Ghjacumu o San Niculau). I suldati (sarghjenti) sò aiutati da a milizia lucali, cumposta d’abitenti, par guardanià i cuntorni.

U pudistatu hè in carica di a virificazioni di i riservi d’acqua è di pruvisti, d’armi è di munizioni. Li tocca à virificà dinò ch’eddi sò sarrati è bè ogni sera i porti di u locu. Tutti l’altri cità fatti da i Ghjinuvesi assumigliani u mudeddu bunifazincu (Calvi, Bastia, San Fiurenzu, Aiacciu).

In Corsica Suttana, ind’u golfu di Sagona – cumuna di Casaglione – ci stava un casteddu dettu casteddu di Cinarca. U vidareti sì vo andeti in Tiuccia è fighjuleti a punta Leca chì assumiglia una campana di zuccaru. In cima, si pò sempri veda, trà dui pintoni, u fundamentu di a so torra maiò.

Un locu simbolicu

S’eddu ci hè un casteddu impurtentu in Corsica, sarà quiddu di Cinarca. Parchì ? Parchì u so pussessu era una di i cundizioni pà essa Conti di Corsica à u Medievu. I dui altri cundizioni erani d’essa di ceppu Cinarchesi (puredu di u famosu è lighjindariu Ugo della Colonna*) po d’essa pruclamatu da i signori corsi mentri una grandi riunioni chjamata « viduta » : L’era data una bachetta o trappa d’albitru o d’aranciu po era « l’Evviva u nostru Conti » !

Capraghja fù dunqua in tuttu u Medievu un locu à pusseda da essa capu di tutti i signori corsi. Fù tandu tistimoniu di tanti vindetti, di tanti battagli di i signori corsi trà di eddi o trà Ghjinuvesi è Corsi.

Era dinò un locu agriculu : i signori ci aviani fattu pona alivi è vigna di rèndita*, intrattinuti da i so paisani.

Dui assedii longhi assai

À mezu à tanti è tanti battagli, dui sò da assignalà :

A prima hè quidda contru à Raffè da Leca, signori Cinarchesu putenti, ind’u 1454 : tensi più di trè mesi contru à l’armata ghjinuvesa cumposta di 700 omi cù 4 bumbardi. Ci era tanti barrachi intornu à u casteddu chì u locu paria una cità, à leghja a ghjenti di l’epica. Fù fattu un pattu : Raffè lasciò u casteddu ma si n’andò libaru cun tutta a so truppa è u matiriali.

A siconda uppunia u Conti di Corsica Ghjuvampaulu da Leca, nipoti di Raffè, à i Ghjinuvesi. Durò più di 2 mesi l’assediu ma da Leca è i soi si ni possini andà scappendu. Ci era milli suldati à l’intornu.

Quandu si vedi u locu, omu si dumanda comu fà par tena tantu ind’un locu cusì chjucu, paragunatu à i casteddi chì si poni truvà in l’altri paesi.

Intarpritazioni di ciò ch’eddu fù u casteddu sottu à GP da Leca
(circa u 1500)

Un locu da strughja

Di u vechju casteddu, ferma pochi affari… Hè statu arruinatu sanu sanu da i Ghjinuvesi ind’u 1493, quandu a citadedda d’Aghjacciu fù compia. St’azzioni l’hà vulsuta u capu di a riprissioni (Ambroggio de Negri), mandatu da l’Uffiziu San Ghjorghju chì tinia tandu a Corsica.

Dicia st’Ambroggio de Negri ind’u 1489 : Ci voli à disabità* u rughjoni di Cinarca è pupulà à Aiacciu, custruì un furtezza ind’a cità è stirpà sana a razza di i da Leca (l’ultimi Cinarchesi à uppona si à u puteri ghjinuvesi).

Era a sola suluzioni pà una paci durevuli. Tandu a citadedda aiaccina fù fatta, Aiacciu pupulatu da numarosi famigli ghjinuvesi, a Cinarca biutata di a so ghjenti è u casteddu spiantatu sin’à i fundamenti.

Ma a vera fini di u casteddu veni da u fattu ch’eddu ùn era fattu da risista à l’armi novi com’è i brunzini è i bumbardi chì lampavani petri tondi di guasgi 130 chilò ! Ùn pudia risista chì i so muragli erani sprufundati è i so torri scapicciati. Firmava solu u simbulu cinarchesu.

L'armi

Par ciò chì tocca à l’armi ind’u casteddu, ripigliemi appena u listinu datu da parechji autori :

Ind’u 1457, ci si trovani 47 armi à focu : 3 scuppetti, 8 spingardi, 24 cirbutani, 8 bumbardi è 3 brunzini (classificati sicondu a taglia di i munizioni, da una   meza libra à 275 libri – una libra vali guasgi un mezu chilò). Ma ci erani dinò l’armi purtativi : 28 balestri, 5 à turnu (armati da una manuvedda) è 23 à tibia (armati cù i bracci).

Quandu si sà chì ogni suldatu t’avia di più i so armi parsunali (arcu o cursesca*), si capisci a putenza di risistenza di Capraghja.

In pirmanenza, u casteddu era tinutu da una vintina d’omi (u castiddanu, i suldati, i servi, u barbieru, u bumbardaghju…), ma un signori cinarchesu pudia livà in furia una truppa di più di milli suldati à pedi è una cintinaia di cavalieri.

Ciò chì ni ferma

À chì ùn la sà, u locu pari solu un scogliu ma à chì sà fighjulà ricunnosci calchì parti di u casteddu Midiivali : i fundamenti di a torra bianca è di a torra quatrata, u fondu di un bastimentu, a ciustarra è uni pochi di muri di difesa tuttu intornu.

Vicinu vicinu

Liata à u casteddu, à dui passi, ci hè a vechja cappedda sant’Antone. Quista hè rumanica ma hè sicuru ch’eddu ci n’era una nanzu à u listessu locu. Ni parla Ghjuvanni da la Grossa ind’a so cronaca scritta à u XV^mu :

"Il Conte Arrigo diede a Biancha a so figlola per moglie al figlo primogenito dil Conte Forte di Cinarca che si chiamava Antone, il quale perchè Biancha sua mogle era tanto devota li fecie fare una chiesa al collo appresso dil Castello di cinarca chiamata S.Antonio, a rimembrenza dil suo nome, ed appare anchora la chiesa S.Antonio al collo dil castello rovinato di Cinarca."

Hè cunfirmata quì l’allienza trà i dui branchi chì darani i Cinarchesi : Antone, figliolu di u Conti Forte da Cinarca sposa à Bianca, figliola di Arrigu bel Messere, Conti di Corsica versu l’annu milli. Li didicheghja una cappedda chì porta u so nomi. Quidda chì si vedi oghji saria una rifacitura di u XV^mu. A ghjenti di Sari è di u cantoni ci vinia sempri à u XVI^mu, sicondu Munsignori Giustiniani.

L'absidi è un vatru di a cappedda arruinata

È nanzu à u casteddu ?

U locu di Capraghja era pupulatu beddu nanzu à l’arrughjunera di Cinarcu, figliolu di u conti rumanu Ugo della Colonna, versu l’annu 825.

Si trova sopra locu vistighi di i pupulazioni anziani : aggrotti, tarragli, macini, pisteddi, pezzi di pioli di petra…

A cuddetta sana sana era aduprata da l’omi preistorichi, da u Niulìticu à l’Ità di u farru. I Rumani chì s’erani stabbiliti in Sagona è in Urcinu vicinu ci ani lasciatu ancu eddi pezzi d’ànfuri. Vali à dì chì u locu fù accupatu da 4000 nanzu à Cristu à u 1493 !

Tuttu intornu à u casteddu, a cuddetta hè carca à vistighi di a preistoria, soprattuttu di l’ità di u bronzu è di u farru. Ci si trova dinò macineddi pà u granu, purtativi o fissi.

In cunclusioni, si pò dì chì da l’Ità di u bronzu sin’à u XVI^mu seculu, u locu fù pupulatu di modu cuntinuu.

*Ugo della Colonna : sicondu a lighjenda è i scritti di u cronacu Ghjuvanni della Grossa, saria un conti rumanu mandatu da u Papa à u 9^u seculu da  lampà fora i Mori musulmani chì tiniani a Corsica. Vensi Ugo cù dui figlioli (Bunifaziu è Cinarca), parechji cavalieri di nobili famigli rumani è un’armata. Vittoria fatta, u paesi fù spartutu trà di eddi, tutti sottumissi à Bunifaziu.

*a disabitazioni : l’attu di disabitazioni era di i più crudeli. Sicondu Andrea Doria, in carica di a riprissioni ghjinuvesa, ci vulia à lampà fora tutta a ghjenti, arruinà tuttu u paesi o a pievi sana, taglià l’arburi, i vigni è difenda di pona è di fà pascia i bestii. Dopu a disabitazioni, ciò chì firmava parmittia appena di veda chì u locu era statu abitatu !

*cursesca : lancia corta armendu prima i suldati corsi à pedi ed à cavaddu, po parechji armati di u mondu.

*di rèndita : chì portani binifizii.