Stu situ di prima impurtenza si trova ind'u vaddi di Liamone, stu fiumi chì smeza u golfu di Sagona. Ghjustu sopra à u fiumi, nant'à una cuddetta alta centu metri, s'hè trovu un insemi di chjappi è di pintoni cù macini è cupuli zuccati. Ci veni à menti u travagliu intinsivu di macinera di a biada (granu, orzu…) ma ancu a scuncassera di i ghjandi. Pari tandu l'agricultura bedda urganizata. I sucità paisani mettini à campà in paesi.

Hè stimata a pupulazioni di u locu à guasgi 200 parsoni, una ciffra impurtenta trattendu di i cumunità di l'epica. Amparemi scuprendu è scavendu chì st'omi di a fini di u Niuliticu sò capaci è garbati in a sfruttera di i risorsi di a natura è, di sicuru, arrughjunà si in i lochi adatti.

U Monte lazzu hè pupulatu da u Niuliticu anzianu à l'Ità di u bronzu ma sarà ancu fraquintatu da i pastori in impiaghjera sin'à pocu. Uni pochi di vistighi di matiriali di u Midievu dani a prova d'un locu sempri accupatu da l'omu. A so pusizioni giugraffica trà u casteddu di Cinarca è l'antica cità di Sagona, a vicinenza cù a villa d'Urcinu ni faci un locu ricircatu. Ni dani a prova ancu i furtificazioni midiivali è storichi situati à centu metri à tiru d'aceddu, nant'à u poghju chjamatu Capigliolu.

S’hè trovu in Monte Lazzu 160 macini nantu à monti, 37 cupuli, 67 macini mobili cù 136 pisteddi o macineddi. Certi macini sò disposti accantu una à l’altra è ci n’hè sin’à 12 paralleli, fendu di stu situ un centru impurtintissimu di macinaria.

U situ di Filitosa hè statu scupartu da Carlu Antonu Cesari è scavatu soprattuttu da l'archiolugu Roger Grosjean. Hè postu u situ nant'à un poghju di a cumuna di Suddacarò chjamatu Turrichju. Stu tuponimu veni di sicuru da i dui torri prisenti. Filitosa hè statu accupatu da u Niuliticu anzianu sin'à u Midievu. Hè rinumatu chì ci si trovani assai stantari à forma umana. Certi sò armati, tutti sò à mezu à i più beddi di Corsica. A scuparta di parechji tarragli cardiali, urnati cù un cunchigliu, cunfermani un accupazioni toccu u Niuliticu anzianu (5 000 mila anni nanzu à C.). L'omi priistorichi si ghjovani tandu di l'accatastimi di i monti è di i so aggroti parechji da allughjà si.

Ma hè toccu l'Ità di u bronzu ch'eddu hè pupulatu u più u situ. Un accintu hè fattu cun petri tamanti, à l'usu di l'epica, guardendu un insemi di munimenti pà u più cumplessu :

• parechji fundamenti di capanni, attunduliti, forsi ciò chì ferma d'un paesi ;
• un tarrazzolu di difesa o di cuntrollu (munimentu à Liventi) cù un camminu d'accessu largu 2 metri 50.
• un munimentu tondu (12 à 15m di diametru fora) cù una camara sola. A so funzioni era forsi rilighjosa. Hè à u centru di l'insemi. Ind'a camara, ci era una bedda ziglia (fuconu) cù una sola di tarra rossa d' 1m² è spessa 20 cm. A u pedi di sta cedda sò stati trovi parechji pezzi di stantari.
• un munimentu maiò, tondu ancu eddu, ma fattu quistu cù dui camari (cavità) è di parechji curridori. Si tratta quì di u munimentu à Punenti, d'un diametru trà 16 è 18 metri è altu di 3 o 4. A so funzioni assumiglia quidda di l'altri torri di l'isula : un locu d'accantera.

Sò stati trovi in Filitosa 16 stantari (statuli) è 32 pezzi zuccati. Roger Grosjean pinsava ch'eddi erani raprisintazioni di i guirrieri « Sardani », un populu di u mari, visti a sumiglia trà u so armamentu è quiddu zuccatu nantu à i stantari. Ancu s'edda pò piaci, st'intarpritazioni ùn hè più ricivebuli oghji chì certi stantari sò più vechji cà a civilizazioni Sardana.

U situ di Terrina, nant'à a Costa Uriintali di l'isula (accantu à Aleria), hè datatu di u Calculiticu, vali à dì l'Ità di u Ramu. Hà datu u so nomi à a cultura chì li và liata, u Tirrinianu.

Scupartu in l'anni 70 da G. Camps, hà palisatu parechji ilimenti cunfirmendu a fonti di mitaddu, com'è sti 25 pezzi di strughjitoghji, i rocci è una lesina longa 6 cm. Ci hè stata trova ancu un pezzu di bucculari, stu canneddu di tarra cotta chì ghjuvava à purtà l'aria da u buttacciu à a stazzona.

Pà i sdrughjitoghji, i spirienzi ani pruvatu ch'eddi cuntiniani 38 cl, ciò chì faria 340 g di ramu à u massimu. Un altru ùn pudia ghjuvà cà par 65 g.

L'impurtenza di stu situ veni da u fattu chì a so datazioni cù u carboniu 14 ci dà circa 2 600 anni nanzu à Cristu. Faci di a Corsica unu di i primi paesi di u Maritarraniu ad essa statu toccu da u finominu di a fonti di u ramu.

Sdrughjitoghji pà a fonti di u ramu di u Monte Castellu d'Osari - Museu di l'ADECEC - Cervioni