U Principi Louis Napoléon Bonaparte, figliolu di Louis (Rè di Ullanda) è di Hortense de Beauharnais (figliola di l’impiratrici Joséphine) hè u nipoti di Napulioni u 1^ma.

Alettu prisidenti di a Ripublica ind’u 1848, riesci à stabbiliscia l’Imperu bramatu ind’u 1852 è piglia tandu u nomi di Napulioni u III^zu.

U sicondu Imperu ferma u simbulu di u sviluppu acunomicu di l’isula è di l’entri di a corsica ind’a mudirnità. Ni tistimuneghjani i 119 ponti custrutti, l’apartura di 1 000 chm di stradi impiriali (Bastia – Aghjacciu, capicorsu, Calvi-Ponte à a Leccia-Cervioni…), i 501 chm di cammini furistieri o a missa in cultura di 40 000 ettari nant’à a i piaghji. L’Imperu vedi ancu l’apparizioni di l’alti forri di Toga o di A Sulinzara, po l’alzera di u palazzu di ghjustizia di Bastia. In Aghjacciu, si faci l’apartura di u Corsu Grandval, a custruzzioni di l’uspiziu Eugénie è l’allarghera di u portu.

L’intaressu di l’Impiratori pà a Corsica si cunferma cù a so participazioni finanziaria à a rializazioni di a statula di Napulioni è di i so frateddi chì sarà missa nant’à a Piazza di u Diamanti d’Aghjacciu (1865). Ma a Corsica fù raligrata soprattuttu da a so prisenza u 14 di sittembri di u 1860 pà l’inaugurazioni di a cappedda impiriali accugliendu i cennari di Letizia Bonaparte è di u Cardinali Fesch.

Sta Corsica bunapartista sarà chjamata « viculu di i tiranii » da i Ripublicani dopu à u scumpientu di Sedan chì chjosi a paghjina impiriali ind’u 1870. Clémenceau pruposi ancu una muzioni dumandendu chì « la Corse cesse immédiatement de faire partie de la République française », dumanda ricusata da l’unanimità di l’Assimblea. Saria statu un affronti maiò pà i famigli di i 5 000 Corsi morti à u Campu d’Unori à a guerra di u 1870.

Natu u 4 di sittembri di u 1899 in San Gavinu di Carbini, fù stitutori in Africa in l’annati 20 è 30 Ghjuvanni Nicoli.

Fù unu di i fundatori di a risistenza. Sbarcatu d’Alger di dicembri 42 cù u famosu sottumarinu Casabianca, urganizò i scali d’armi è di munizioni da priparà l’arrivu di i « troupes de choc » chì libararani u paesi.

Fù arristatu da i fascisti di ghjugnu di u 43 è cundannatu à morti. Ùn vidarà mai u so paesi libaru.

A lettara ch’eddu lasciò à i soi, u 30 d’aostu di a listessa annata, ferma stampata pà u sempri ind’a mimoria cullitiva corsa. Scrissi stu militenti cumunistu di prima trinca nant’à un pizzateddu di carta :

À me ziteddi.

Da quì à pocu mi n’andaraghju. Sì vo sapissiti quant’e sò chietu, guasgi filici di mora pà a Corsica è pà u partitu. Ùn piigniti, surriditi mi. Siati fieri di u vostru babbà. Sà eddu chì vo u pudeti stà. A testa mora è u fiori rossu, hè u solu dolu ch’e vi dumandu.

À l'orlu di a tomba, vi dicu chì a sola idea chì, nant'à a nostra povara tarra, mi pari bedda, hè l'idea cumunista.

Morgu pà a nostra Corsica è pà u partitu.