Natu nant’à a cumuna di Bastelica ind’u 1498, hè dighjà à batta si com’è mircinariu ind’u 1516 ind’i bandi neri di Giovanni de’ Medici. Cumbattendu pà i Medici, u Papa è u rè di Francia, si ritrova Cunduttieri sott’à l’ordini di Francescu u 1a è li tocca à difenda à Marseglia ind’u 1536 contru à Carulu u Vu. Si batti cusì in Perpignan, Landrecies, Saint Dizier, Calais, po soprattutu in Italia, tarrenu d’impurtenza maiò pà i litichi trà a Francia è a Spagna, sustegnu di Ghjenuva.
Samperu, isciutu da una mamma apparintata à i signori Bozzi, si marita cù Ghjuvannina d’Urnanu, figliola di un signori fidu di Ghjenuva ma arcipurfigliola di Ghjuvampaulu da Leca, ultimu Conti di Corsica mortu in isiliu in Roma in u 1515, nimicu di a Ripublica di Ghjenuva è di l’Uffiziu San Ghjorghju. I rivindicazioni di Samperu sò quiddi di Ghjuvampaulu chì luttò ancu eddu accantu à i Medici (Lorenzo) in u so tempu : dumanda à i Francesi u pusessu di a so Cuntea è ripiglia à contu soiu a bandera cinarchesa rossa è verdi.
U scopu di a Francia hè di piglià a Corsica da taglià i cumunicazioni trà a Spagna è l’Italia. Ind’u 1553, i Francesi sbarcani in Corsica è s’aghjugnini i cumpagnii di Corsi à favori di Samperu. Hè cunquista l’isula. Ma a paci firmata trà a Francia è a Spagna in « Cateau-Cambrésis » cunferma chì i Ghjinuvesi sò maestri di l’isula. Samperu dicidi di cuntinuà a lotta solu. Senza sustegnu o pocu di i paesi putenti, cumencia à indibuliscia si po hè tombu à l’ità di 69 anni versu u paesi d’Eccica Suarella da i frateddi di a moglia Vannina ch’eddu avia strangulatu.
Armuratura di Samperu cù u casteddu di Cinarca, u lioni di l’Urnani è di i Bozzi è u fiordalici di u Rè di Francia. I culori erani u rossu è u verdi, culori di u Conti di Corsica Ghjuvampaulu da Leca, arcimissiavu di a moglia (Ghju)Vannina d’Urnanu.
Natu ind’A Stretta di Merusagliu in una famiglia di sgiò, hè Pasquale u figliolu di Diunisa Valentini è di Ghjacintu Paoli. Sarà u babbu, cù Andria Ceccaldi è Don luiggi Giafferi, unu di i capi di a rivolta contru à i Ghjinuvesi ind’u 1734.
Dopu à u fiascu di u Rè Tiadoru, a famiglia piglia a strada di l’isiliu versu Napuli. U prima figliolu, Clemente, si ni ferma in Corsica. Pasquale diventa ufficali di u righjimentu « Corsica », cumpostu pà una gran parti di migrenti Corsi. Sò dinò st’annati d’isiliu quiddi di a furmazioni intillituali. Pasquale hè in cuntattu cù l’illuminisimu po si nutrisci di cultura antica. Ampara parechji lingui com’è u francesi, l’inglesi è u talianu. A dibulezza di i Ghjinuvesi è una rivolta nova parmettini à Pasquale di ritruvà i so spondi. U frateddu Clemente hà fattu a so opara in Corsica è Pasquale sarà numinatu à u gradu di Ghjinirali di a Nazioni, u 14 di lugliu di u 1755, à a cunsulta di u cunventu Sant’Antone di a Casabianca.
U prima scopu soiu sarà d’adunisci tutti i corsi daretu à eddu è ùn hè cosa semplici. Certi tinenti di u puteri, soprattuttu i sgiò isciuti da i signori Cinarchesi, ricusani u so puteri. Matra in Cismonti è Colonna da Bozzi in Pumonti sò di i più arrabbiati. Dopu à parechji cumbatti sanguinosi, Paoli piglia u capu di l’isula è di a Nazione. Faci di Corti a Capitali è ci metti i so puteri è a so amministrazioni :
- Puteri asicutivu è ghjudiziariu à u Palazzu Naziunali
- Puteri lighjislativu à u cunventu San Francescu
- Zecca in carica di a muneta
- Univirsità
Da impidiscia u cummerciu di i Ghjinuvesi in Calvi, faci a cità è u portu di Lisula ghjustu accantu. In più di l’armata pupulari, faci un’armata prufissiunali (a truppa pagata), cumposta di 1200 suldati scumpartuti in 30 cumpagnii. Faci ancu una marina di guerra. L’epica viulenta u porta à rinfurzà u so puteri : alettu à vita, hè u solu maestru di l’asicutivu. Riduci u numaru di i Cunsigli di Statu. Da 144 ch’eddi erani ind’u 1755, ùn sò più cà 9 ind’u 1764. Imponi una ghjustizia dura assai, a ghjustizia paulina, chì lotta contru à i tradimenti è l’usu di a vindetta.
A disfatta di Ponte Novu u porta una volta di più nant’à i stradi di l’isiliu, ma sta volta in Inglitarra.
Dopu à a Rivuluzioni francesa, hè chjamatu in Francia da l’Assimblea chì u ricevi com’è un aroiu di a libartà. Si franca sti Franci da Parighji à Marseglia, affiancatu d’un antru aroiu, u ghjinirali Lafayette. Volta ind’u paesi soiu cù u titulu di « Prisidenti di u Cunsigliu ». I Corsi u chjamani tandu « u Babbu di a Patria ». Quand’edda nasci a pulitica di u tarrori, s’alluntana assai di a leghji è hè dinunciatu à a Cuvinzioni da un frateddu di Napulioni Bunaparte, Lucianu. Tinutu da traditori, missu in accusu, si ni ritorna vechju è stumacatu in Londres ind’u 1795, po ci mori ind’u 1807.
Armuratura di i Paoli di Merusaglia :
Cori in fronti è strada dritta
Natu u 15 d’aostu di u 1769 ind’a so casa di a stretta San Carlu d’Aghjacciu, hè figliolu di una famiglia di picculi nutabuli. Sta casa li veni da i parti di Letizia, a mamma, isciuta da i Bozzi.
Sin’à a disfatta di Ponte Novu, a famiglia campa in Corti. U babbu, Carlu Maria, hè cumpagnu di Pasquale Paoli sin’à u so isiliu in Inghilterra ma faci allienza subbitu dopu cù u riami francesi. Si faci tandu ricunnoscia Nobuli da ginialugisti tuscani è cusì pò essa alettu Diputatu di a Nubiltà, raprisintà a Corsica in Versailles po avè borsi di studii pà i so figlioli. Mandarà i dui più vechji in cuntinenti (1778) : Ghjaseppu da divintà preti, Napulioni da divintà militari.
Napulioni riveni in Corsica parechji volti trà u 1786 è farraghju di u 1791, quand’eddu scegli di sustena a Rivuluzioni. Di ghjugnu di u 1793, hè furzatu di scappà cun tutta a famiglia. U frateddu Lucianu veni d’accusà à Pasquale Paoli, u Babbu di a Patria, di tradimentu davanti à a Cuvinzioni. A cunsulta di Corti dicidi a so infamia parpituali.
1ma Cunsulu po Impiratori, manda à Miot da truvà suluzioni à i prublemi finanziarii è pulitichi di l’isula. I dui Dipartimenti (Golu è Liamoni) sò uniti in un solu è a Corsica hè dutata d’una fiscalità sputica. L’isula hè missa in mani à u ghjinirali Morand in carica di a riprissioni da u 1803 à u 1811. A « ghjustizia murandina » multiplicheghja l’arristazioni, i turturi è l’asicuzioni. I so culoni mobili parsiguiscini i banditi veri ma dinò i pulitichi chì li vani contru : a ghjenti mandata da l’imigrati in Tuscana, a ghjenti mandata da l’Inglesi pò i partitenti di Pasquale Paoli.
Ind’u 1814, à a fini di l’Imperu, Bastia chjama a flotta inglesa à l’aiutu. Ind’u 1815, l’Aghjaccinchi lampani u bustu di l’Impiratori in mari !
In cunclusioni, ammintaremi chì Napulioni cunquistò guasgi tutta l’Auropa è una parti di l’Africa di u Nordu, à l’usu di i rumani à u so tempu, po missi à u so capu i so vicini, frateddi o cugnati. Napulioni hè un’asempiu di a riisciuta d’un Corsu spatriatu, ch’ùn fù capitu è ricunnisciutu ind’è eddu.
DA TENA À MENTI