Quiddu chì si chjamarà Ghjudici da Cinarca nasci Asinunceddu da la Rocca versu u 1213. Hè u figliolu di Guglielmu è u purfigliolu di Arrigu da Cinarca, dettu « u Cinarchesu ». St’ultimu avia avutu trè figlioli è dui campavani ind’u casteddu di Cinarca. Dopu à un imbrogliu, u più ghjovanu, Guglielmu, si n’andò ind’u casteddu di A Rocca di Vaddi, accantu à Ulmetu. Sarà u prima di a dinastia di i « da la Rocca ». Quandu u frateddu Guidu mori in Cinarca, i dui figlioli chjamani u ziu par l’intarru. Ghjuntu in Cinarca, Guglielmu hè lampatu in prighjò da i nipoti (Arrigu Arechjiritti da Cinarca è Rinieru Pazzu da Cozzi) è si ni mori.

Asinunceddu hè missu for di piriculu ind’è u so ziu Truffetta, ind’u casteddu di Cuvasina. Hè mandatu in Pisa u ghjuvanottu (si saria liticatu cù u ziu) po volta in Corsica ind’u 1245. I Pisani l’ani fattu Conti di Cinarca è Ghjudici di Corsica.

À pocu à pocu, pigliarà a suprana nant’à l’altri signori è i so casteddi. Ind’u 1250, hè ricunnisciutu à una viduta tinuta à a bocca di San Ghjorghju com’è signori di i tarri partendu da sta bocca sin’à Bunifaziu.

Ind’u 1257, dicidi di vindicà u babbu : Arrigu Arechjiritti è Rinieru Pazzu sò tombi. Ghjudici piglia u casteddu simbolicu di Cinarca è ind’u 1264, hè ricunnisciutu signori di tutta a Corsica. Sarà chjamatu tandu Ghjudici da Cinarca.

Nasci una guerra trà eddu è un signori putentu di Cismonti (Corsica suprana), Ghjuvanninellu da Larata. Vinci Ghjudici dopu à quattru anni ma a Corsica firmarà pà u sempri spiccata in dui  parti, quidda di Ghjudici è quidda di Ghjuvanninellu.

Ind’u 1300, hè traditu da u figliolu bastardu Salinesi. Vechju è cecu, mori ind’a prighjoni ghjinuvesa di Malapaga ind’u 1304.

Sin’à l’ultimi signori, quiddi upposti si diciarani di a parti di Ghjudici (Rinucciu da la Rocca) o di quidda di Ghjuvanninellu (Ghjuvampaulu da Leca)

Si sà pochi affari nant’à i Ghjuvannali, for di ciò chì n’hè dettu ind’a Cronaca di Ghjuvanni da la Grossa. U cuntestu, eddu, hè cunnisciutu.

U XIV^mu seculu hè un seculu di guerri di succissioni sopra tuttu dipoi a morti di Ghjudici da Cinarca. A Corsica si guverna da par edda è i quattru bastardi di Ghjudici sò à batta si trà di eddi da piglià u puteri. Veni dopu  a presa in mani di Guglielmu da la Rocca, aiutatu da i Ghjinuvesi ind’u 1343. Hè l’epica di i signori banditi, à l’usu Guglielmu Cortincu, dettu Sciumaguadella, chì campa d’assassinii è d’arrubbera. È stu seculu hè ancu quiddu di l’abbotti saracini è l’epidemia di pesta !

Hè in stu cuntestu ch’eddi nascini i Ghjuvannali, Fraticeddi franciscani chì ricusani a civilizazioni matirialista è dunqua a ghjesgia cristiana di l’epica. Pridicheghjani à favori di a spartera di i ricchezzi, a suprana di u spirituali nant’à u matiriali. U muvimentu cresci in furia cù l’addisperu di a ghjenti. In testa, ci saria un certu Hioannes Martini è un antru Ristoru chì difindarà i Ghjuvannali davant’à a Ghjesgia ufficiali.

I capi sariani dui frateddi, signori scartati da u puteri è lasciati senza tarri. Si tratta quì di Polu è Arrigu da Laitalà, bastardi di Guglielminucciu da Laitalà.

Ind’u 1352, si stabbiliscini in Carbini.

U seguitu hè cunnisciutu : scumunicazioni, ordini à tutti i Corsi, militari o paisani, di stirpà u razzinu. Un certu Rafinu i porta in Alisgiani induv’eddi sarani ammazzati.

Ni dici u storicu Monteggiani :

"E in quel medisimo stante, dopo la morte di Goglermo della Rocca, Polo e Arrigo, fratelli bastardi di Golglermo di Laitalà, visto che tutti li signori di Corsica che erano stati sposseduti a tempo di goglermo della Rocca, tutti erano tornati al loro dominio e signorio, e che per tutto non li era sopra a loro signore nesciuno che le dominasse, procurorno di trovare modo di avere anchora Signoria. Si ritirorno in Carbini, e sotto nome di devotione formorno una certa confratia di homini e di femine, la quale andava cresciendo in quantità, e si chiamavano quelli della confratia li Jovannali. E dopoi cominciorno a dire che non li dovea esserez beni proprii, se non che dovea essere tutto in comune. E per più demostrazione di grande devotione e acquistare più credito et avere dalla sua parte e confratia più concorso di gente alla loro confratia. E Polo era il majore il chiamavano frate Polo et alcuni misser Polo. Era il capo e principale della confratia, e lui con molti confrati comminciorno a caminare per Corsica e passorno li monti verso tramontana. E arrivati in Alesciani frate Polo morse. E la compagnia resto in piedo tanto che se ne ando la fama a Roma ; ed essendo informato il Papa di questa cunfratia, judico che era specie d’eresia. Per il quale mando un frate che si chiamava frate Giorgio Sardo, di ordine di San Francesco, e fece fare la crociata contro li Jovanali in Alisciani, e la una e la altra parte erano tutti Corsi. E la crociata vinse, e restono li Jovanali morti e abbrucciati in quello medisimo luogo."

Toccu u XIII^mu seculu, i partitenti di Pisa, di Ghjenuva o di l’Aragona s’intazzani. Difatti, Ghjenuva ùn ricunnosci a dunazioni ch’eddu feci u Papa Bunifaziu VI à u rè d’Aragona ind’u 1296. Sti lotti isulani portani a Corsica versu l’anarchia fiudali. Ogni signori incascia l’impositi chì pesani di più à in più nant’à u populu. Nascini cusì in Cismonti rivolti pupulari. A listessa cosa accadi par sti Franci cù i « Jacqueries » di u 1358.

Ind’u 1357, certi paisani corsi chì ricusani u puteri di i signori spiantani guasgi tutti i casteddi di i nobili signori, for di quiddi di Bunifaziu, Calvi, Biguglia, Nonza, San Culumbanu po Cinarca (à stu mumentu, sti casteddi sò à favori di Ghjenuva).

Ind’u 1358, una viduta si teni in Merusaglia è porta à u capu di a rivolta un certu Sambucucciu d’Alandu. Sambucucciu, capipopulu di u Cismonte, hè unu di i 4 imbasciadori di Corsica chì sbarcani in Ghjenuva da dumandà a so prutizzioni è a numinazioni d’un Guvirnadori. Prisentani cusì l’umaghju è a fidiltà di l’isula à u Doga. Si vedi quì a didizioni di a Corsica à a Ripublica di Ghjenuva. Sambuccuciu hè tandu unu di i capipopuli di u « cunsigliu », in carica d’aiutà u Guvirnadori ghjinuvesi par l’amministrazioni è a ghjustizia.

À l'epica Paulina, Sambucucciu sarà disprizzatu par via ch'eddu avaria favurizatu u puteri ghjinuvesu è u so stabbilimentu in Corsica.

Quandu u babbu Arrigu “Arechjiritti” da Cinarca hè tombu da Ghjudici, u figliolu Guidu della Catena faci alzà un casteddu à u locu dettu Lecca. Nasci tandu u ceppu cinarchesu di i “da Leca”. Ghjuvampaulu hè u figliolu di Risturucciu è u nipoti di u gran Raffè da Leca. Tutt’à dui, funi ammazzati da i Ghjinuvesi ind’u rughjoni di Vicu (Arburi), ind’u casteddu Leca dettu Castaldu. Vinti dui Leca funi tombi à tradimentu da i Ghjinuvesi.

Ghjuvampaulu, chjucu, era addivatu in Tuscana da u zioni, Ghjucanti. Sta branca firmarà cusì salva.

I Milanesi, lasciati à u puteri da l’Uffiziu, parmittarani à i da Leca di ritruvà a so signuria. Hè spartu stu tarritoriu trà i cucini da Leca : à Ghjuvampaulu l’hè datu u casteddu di Lecca è à Rinucciu l’hè datu u casteddu di Cinarca. I cucini si liticani. Ghjuvampaulu, prima sustinutu da l’Uffiziu San Ghjorghju, piglia a so indipindenza è cumbatti i Ghjinuvesi. Nasci una guerra cù cucini d’un cantu è da l’altru (Rinucciu da la Rocca veni à cumbatta à Ghjuvampaulu). Ind’u 1481, u signori faci alzà u Cunventu furtificatu di Vicu. Signori u più putenti di Corsica, liatu à parechji famigli, putenti ancu eddi, di Cismonti è Pumonti, hè alettu Conti di Corsica ind’u 1487 à a viduta di u Borgu di Mariana. Hè dettu alliatu à Lorenzo de’ Medici.

Da u 1486 à u 1501, cerca di piglià a suprana nant’à i Ghjinuvesi è nant’à i cugini da la Rocca. Ogni volta ch’eddu capituleghja, parti Ghjuvampaulu in isiliu in Sardegna po volta è ricumencia à purtà i pupulazioni à a rivolta. Ind’u 1501, volta dinò in Corsica è fiasca par l’ultima volta. Mori in Roma ind’u 1515 è ci hè intarratu ind’a ghjesgia San Francesco a ripa.

Trà mezu à i matrimonii parechji chì l’ani parmissu di fà l’allienzi, ci n’hè unu di a figliola cù Alfonsu d’Urnanu chì li farà tradimentu dopu è participarà cù i Ghjinuvesi à u maceddu di Foce d’Ortu. Parti è più di i so partitenti ci sarani ammazzati.

I guerri di Ghjuvampaulu caghjunarani parechji campagni di riprissioni tarribuli ind’a so signuria : i pievi di Sorru, Sia, Cinarca è Niolu sarani tocchi da a disbitera.

Sicondu a cronaca di Ghjuvanni Da La Grossa, i cinarchesi sariani isciuti da Ugo della Colonna, Conti rumanu. Sò u fruttu di l’allienza di i dui branchi impurtenti di a so famiglia : quidda di Cinarca (aredi : u Conti Forti da Cinarca) è quidda di Bunifaziu (aredi : u Conti Arrigu bel Missere). Di u matrimoniu di i so figlioli sò nati Andria, Arrigu, Diotaiuti po Arrigu u III^zu, dettu u Cinarchesu. L’aredi di st’ultimu pigliarani a suprana nant’à tutti l’altri cucini è darani u so cugnomi di Cinarchesi : i da Leca, da la Rocca, d’Istria, da Bozzi è d’Urnanu è quiddi spariti da la Catena, da Litalà è da Bisè. A parodda « da » insegna un casteddu.

À colpi di matrimonii cù l’altri famigli putenti o à l’internu, i Cinarchesi sò divintati a sola « famiglia » cun tanti puteri, da u 10^u seculu ad oghji.

Certi Cinarchesi ani pigliatu i pratesi di Pisa, d’altri di Ghjenuva, di l’Aragona o più tardi di Pasquale Paoli o di i Francesi. A guerra trà di eddi da tena u puteri ùn piantava.

A so lascita :

• A testa mora nant’à a bandera corsa veni da i signori chì sustiniani u rè d’Aragona. A testa mora n’hè u simbulu ;
• Samperu Corsu, natu da una mamma Bozzi è maritatu à l’arcipurfigliola di Ghjuvampaulu da Leca, ripresi i culori di l’ultimu Conti cinarchesu è u so discorsu, po missi u casteddu Capraghja nant’à i so armuraturi ;
• I primi rivindicazioni di i rivuliziunarii corsi erani di lascià una parti di u puteri à i nobuli signori di u locu è micca à i nobuli ghjinuvesi ;
• Parti è più di i famigli di sgiò sò ancu oghji di ceppu cinarchesu, in cità è in paesi ;
• L’architittura difinsiva di i paesi (casi forti, casteddi, muragli…) a li duvemi !
• U spiritu d’oghji in Corsica s’assumiglia assai à quiddu di l’epica.

Armuraturi di Samperu di Bastelica, dettu Corsu : u casteddu di Cinarca accantu à a fiordalici di u Rè di Francia è u lioni di i signori da Bozzi è d’Urnanu.