Starrata ind'u 1972 in l'aggrottu d'Araguina à l'intrata di Bunifaziu, hè unu di i più schenatri anziani scuparti in Corsica. A so cunsirvazioni tocca à u locu induv'edda fù sipolta, ind'u calcariu chì si trova solu par sti cuntorni i più suttani di l'isula, po in San Fiurenza pà u Nordu. U restu di a Corsica hè fattu à granitu è maticciu, petri acidi ch'ùn cunservani l'ussami.

A salma era posta nant'à u scogliu, stracquata, u capu ghjiratu à posta versu a dritta. Era cuparta à ocra rossa nant'à 4 o 5 cm di spessu, po di rena. Stu fattu hè carattiristicu di u misuliticu.

Si tratta quì d'una donna d'1,45 metri d'altezza. Era stroppia cù una truncatura di u bracciu micca riduta è dunqua una paralisia. T'avia un denti sciappatu cù un'infiammazioni di a mansedda dulurosa assai po suffria dinò d'artriti è d'un tumori nant'à u schincu chì l'impidia guasgi di marchjà. Ni veni l'ipotesi d'un aiutu cutidianu di a so cumunità. Senza st'aiutu, ùn avaria pussutu campà sin'à i so 35 anni.

À a fini di u 1^ma seculu nanzu à Cristu, l'omi priistorichi di u situ di Capula, nant'à u Pianu di Livia (Alta Rocca), si sò ghjuvati di un aggrottu da intarrà una di i soi. Si tratta quì d'una donna morta trà 18 è 29 anni. Misurava 1m 57 è u so schenatru ci insegna ch'edda campava aduprendu assai a pusizioni aggrunchjata.

A so salma fù trattata di manera particulari postu ch’eddi si trovani accantu avanzaturi parechji. Ci pari ch’edda fù urganizata pà edda una veghja.

U corpu soiu fù spostu ind’una camara fatta cù 13 petri ficcati. Un fuconi hè statu fattu accantu accantu, cù una sola di tarra rossa cotta, com’eddi sarani fatti i fuconi sin’à u principiu di u XX^mu seculu !

L’archiolughi ani trovu una bedda mansa di lumachi, cosa intarpritata com’è una littera. Soga erani posti i pruvisti ? U studiu di l’avanzatura ci indetta ch’eddi ani magnatu l’omi 2 prisutti, 4 cusciotti, una spadda di muntoni, ciò chì faci guasgi 23 chilò di carri, senza tena contu di a carri di viteddu è di boiu. Si pò suppona ch’edda durò a cirimonia parechji ghjorni o ch’eddi erani numarosi à renda l’umaghju à a morta.

Si vedi quì, qualsia si a risposta à sta dumanda, ch’edda ci era una vuluntà affirmata d’anurà a difunta.

Ci pudemi ancu stunà di rimarcà chì oghji, ùn hè sparita sta tradizioni di a magnaria, ancu s’edda si faci avà ind’a casa familiali è micca nant’à a tomba stessa. Si parla tandu d’un usu di più di dui mila anni !

U situ di Capula hè statu accupatu sin’à u Midievu chì ci stavani i signori « Bianculacci », aredi di u Conti Bunifaziu. À dui passi, truvemi u situ priistoricu di Cucuruzzu, cunnisciutu assai cù u so casteddu è a so torra.