Stu libru prisenta una racolta di nuvelle scritte da culleghjani è liceani pà u cuncorsu urganizatu da u Centru Culturale di l’Università di Corti in 1997.

… ralegremuci di vede spampanà a spressione in prosa corsa, è siamune tantu più felici ch’ella hè oramai ropa ancu da giovani, è da zitelli puru. À a lingua ùn li caccerà nunda di a so dignità antica, è li hà da fà prò d’esse manighjata da estri macerbi è, s’ella gira, primaticci. Ci vole à avè fede, cunfidenza è fiducia in issi andati novi di a spressione corsa scritta. S’ella gira, girerà chì si ne saranu impusessati quelli chì sò sculari oghje. Quessi, quandu l’assestu pedagogicu piccia, anu a furtuna di pudè strutturà i so sapè linguistichi, è vedesi porghje cumpetenze di spressione chì mancu à pensà le pè a scola di i so genitori. Sò siguru chì tanti bapi è mamme chì di solitu li incresce à apre un libru scrittu in corsu anu da truvà gustu è piacè à leghje qualchì filare scrittu da i so figlioli. Forse si anu da mette ancu in suchju pè issa lingua è dumandà li qualchì cunsigliu di scrittura… Ùn vi parenu fole?

Ghjacumu THIERS