Inarchitettà un manuale di carta in leia stretta stretta incù a riforma di u liceu, quandu chì parechji editori si sò girati, dapoi un bellu pezzu, ver di u libru numericu, hè scelta bona. Stu cuntattu incù a carta ùn deveribbe sparì da u nostru mondu di a scola nè da quellu di l’insignamentu di modu largu. Sia cum’ella sia, l’autori di stu manuale ùn anu stanciatu à vulè prupone ducumenti novi è di qualità chì rispichjessinu a Corsica d’oghje ma dinò a vita di tandu. Sfuglittate, lighjite, amparate è ùn vi ne vulterite à palmule à collu chì a leia incù u mondu numericu ci hè di sicuru.
Libru di corsu, manuale pedagogicu è mudernu per u liceu, hè un puntellu sicuru di a nostra lingua è ùn ne fi mu un cuncistoriu. Avà l’avimu stu secondu vulume d’Isula Mondi è ch’ella ne sippia ringraziata a squatra di i prufessori chì l’anu purtatu ma dinò l’editore è quelli chì ci anu messu una manu per i sculari d’oghje è di dumane.
