L’idea d’un rumanzettu storicu illustratu in lingua nustrale incù a so traduzzione in lingua frencese hè sempre una bona da tuccà u publicu sculare. Nasce st’idea, in cullaburazione incù u Canopé di Corsica, da l’associu A Madunnetta cù u prugettu di ricustruzzione d’un battellu à vele corsu di u 18 esimu seculu chjamatu A Galeotta.
À spessu si scorda omu di l’impurtenza di u nostru spaziu marittimu è e nostre leie di sempre incù i nostri vicinenti di u Mediterraniu. Purtendu lume di modu rumanescu è storicu à nantu à a marina corsa di u 18 esimu seculu, stu racontu ci discrive un passu di a vita ch’elli pudianu avè i nostri pullastroni di tandu in core à un Mediterraniu micca sempre chietu chietu…
Stu bellu travagliu incù st’illustrazione magnifiche ghjoverà di sicuru à i sculari di i ciculi 3 è 4, chì li venerà aghjustata dinò una sfruttera in ligna, ma ancu à sculari più maiò chì… tutt’ognunu pò diventà stu sculare sfuglittendu un libru cusì da fà spalancà l’ochji…
Ghjacintu Ottaviani
Ispettore pedagogicu regiunale di Lingua è Cultura Corsa
