Signori è casteddi - I primi signori sicondu a cronaca di Ghjuvanni da la grossa -
L'urighjini di u ceppu Cinarchesu - Ghjinialugia pussibuli di i primi signori

I primi signiori sicondu a cronaca di Ghjuvanni da la Grossa

Hè cusi ch’eddi pigliani u puteri i signori suttanacci, isciuti da u lighjindariu Ugo della Colonna vinutu in Corsica da libarà l’isula da i Saracini è altri Mori.

Ugo, nanzu di rientra in Roma induv’eddu morsi (834), avaria spartutu a Corsica trà i so cumpagni di vintura è i so dui figlioli vinuti cun eddu (Bertariu, u maiureddu, saria firmatu in Roma).

• Savelli mortu, hè u figliolu Pinu chì piglia u titulu di signori di Balagna (casteddu di Sant'Antulinu).
• Nasica* hè signori di Golu
• Ganellon** hè signori di Covasina (casteddu di Covasina).
• Carpatta* mortu, Ramundinu hè signori di Talavu (casteddu d'Urnanu).
• Argutu* hè signori di Cavru (casteddu di Talaventu).
• Orlandinu* (nipoti d'Ugo) hè signori di Vicu (casteddi di Letia : Catena è  ghjineparu).
• Dardanu* hè signori di Celavu (casteddu di Salasca).
• Cinarca, figliolu minori d’Ugo, hè signori di Cinarca (casteddu di Cinarca – Capraghja)

Tutti sò sottumissi à Bunifaziu, prima figliolu d’Ugo, signori è capitanu ghjinirali. A Ghjesgia, edda, si teni i cità d’Aleria, Mariana è Nebbiu com’è u palazzu di i primi Conti, Poghju di Venacu, è t’hà u puteri di a numinazioni di i Conti novi. Sparti a Corsica trà Pisani (tutta a Corsica suttana) è Ghjinuvesi (pievi di Mariana è Nebbiu).

À pocu à pocu, certi branchi di a famiglia d’Ugo ani da piglià a suprana nant’à l’altri. Arrigu bel messere, isciutu da i Bianculacci (figlioli di Bunifaziu), diventa Conti di Corsica è lascia u ricordu d’un omu bonu, chì rendi a ghjustizia com’eddu ci voli è chì teni tutti l’altri signori di l’isula. Marita a figliola à Antone, figliolu di u Conti Forti da Cinarca. Par disgrazia, si faci tumbà accantu à Cavru cù i so setti figlioli ghjovani, annigati sottu à u Ponti di i Setti Poddi, chì teni u so nomi da sta passata.

Dopu à eddu, i seculi à vena sò di guerra trà i Marchesi di Massa mandati da u Papa da metta appena d’ordini è lampà fora i Cinarchesi, po i sfarenti branchi di stu nobili ceppu isciuti da Ugo della Colonna. Certi sò sustinuti da i Pisani po da l’Aragona, l’altri da i Ghjinuvesi.

In fini, sò quiddi isciuti da Arrigu u 3^zu, dettu « u Cinarchesu », chì pigliarani a suprana. Essa di stu ceppu parmittia di purtà u titulu di Conti di Corsica.

*  Guirrieri rumani
** Signori di Maganza