A Corsica rumana
À u principiu di u IIIu seculu nanzu à Cristu, a Corsica hè liata assai à i Punichi. A guerra trà Cartaghjini è Roma porta à Lucius Cornelius Scipione à l’assaltu d’Alalia (Aleria in latinu) in 259 nanzu à C. I Rumani imponini a so duminazioni à l’isula sana po levani assai impositi. In 231 nanzu à Cristu, facini di Corsica è Sardegna una pruvincia sola sott’à u cummandu militari d’un Pritori. Sarani spiccati i dui isuli sott’à Augustu, in l’annu 6.
I rivolti contru à i Rumani sò parechji : 191 nanzu à Cristu, 2 000 isulani sò tombi ; 172 nanzu à Cristu, 7 000 morti è 1 700 prighjuneri mandati in Roma. Di più, à a Corsica li tocca à pagà un tribbutu di centu tonni di cera ! A cunquista di l’isula finisci in 111 nanzu à C. cù l’ultima rivolta cunnisciuta.
A rumanizazioni si stendi partendu da i porti impurtenti : Aleria, Mariana, Aiacciu, Sagona o Calvi. U paisaghju cambia cù i culturi di a vigna, di l’alivu è di u granu fatti à l’usu rumanu. Certi anziani di i lighjoni sò arrughjunati nant’à i tarri di Mariana (da Marius) o d’Aleria (da Sylla). A muneta è a lingua latina pigliani a suprana nant’à i vechji usi corsi fendu di l’isulani Corsi-Rumani.
A Corsica pruduci tandu :
- legnu da fà i batteddi (tavuli è maghji di larici)
- rasgina è peci da tuppà i batteddi
- suvaru adupratu par l’elmi, i scudi, i tappi d’ànfuri, i reti pà a pesca (una scrizzioni in Aleria ammenta « 15 cità sottumissi à l’impositu di u suvaru »)
- cunchigli (l’ostrici di u stagnu d’Urbinu erani aparti cù un cugnu quatratu di farru chì s’hà lasciatu i so tracci nant’à a cunchiglia di sopra. Sò cusì l’ostrici trovi ammansati à mezu à i tarragli rumani di Piantaredda. Si pensa chì a parti di sottu cù l’animali era missa in salamoghja po mandata in Roma)
- pesci siccati ; granu ; cughjami ; cera ; meli ; oliu ; vinu.
Parti è più di sti prudutti sò mandati in Roma è certi sò beddi appriziati nant’à i tavulini di i patrizii rumani (nobuli).
DA TENA À MENTI
