À tempu à u sviluppu di a fonti di u ramu po di u bronzu (mischiu di ramu è di stagnu), i siti priistorichi sò cullucati nant'à i poghji più faciuli à difenda. U sicuritariu piglia a suprana nant'à l'altri cunsidarazioni.

I stirpugli corsi fermani chjuchi ma si sviluppani, si struttureghjani è s'urganizeghjani di più. S'alzani casi maiò rittangulari (sin'à guasgi 30 m²) cun tettu à dui acqui, è soprattuttu stantari è toli. Hè l'epica di u Migalitisimu. Torri è casteddi sò prisenti in Corsica suttana.

DA TENA À MENTI

I casteddi di l’Ità di u bronzu supraneghjani guasgi sempri i spazii di cultura è d’addevu. Ghjovani à tempu d’aggrottu, di locu di surviglienza è di locu d’accantera.
I so muri sò fatti à petri tamantoni.