A fini di a fiudalità

L’epica muderna principia dopu à u 1500. Hè a fini di i signori Cinarchesi cù l’ultimi riprissioni di l’uffiziu San Ghjorghju contru à i sustegni di GhjuvamPaulu da Leca (ultimu Conti di Corsica) po di Rinucciu da la Rocca (ultimu signori). Mortu st’ultimu, parechji pievi sò pacificati : a ghjenti hè lampata for di locu, i casi sò brusgiati, l’arburi tagliati, i vigni spiantati. Sò cusì nittati u Niolu, u Sia, Sorru è Cinarca.

I sgiò à favori di Ghjenuva sò stabbiliti ind’i paesi, prumessa fatta d’ùn fà ci furtificazioni. À pocu à pocu, dopu parmissioni data da i Ghjinuvesi, ci alzani casi forti parmittendu una pruttizzioni contru à l’abbotti barbareschi è a pupulazioni.